މުއިއްޒު އަރިހުގައި ތިބި ބޮޑެތި ވަގުންނަށް އަޅުގަނޑު ކައިރިން ޖާގައެއް ނެތް: ޔާމީން
ހުސެއިން އާދަމް
ރައީސް ޑރ. މުހައްމަދު މުއިއްޒުގެ ސަރުކާރުގެ އިސް މަގާމުތަކުގައި ތިއްބެވި ބޭފުޅުންނާ މެދު އެއްވެސް ޒާތީ ހިތްބުރަކަމެއް ނެތް ނަމަވެސް، އެމަނިކުފާނުގެ އަރިހުގައި ތިއްބަވައިގެން ވައްކަމުގެ އަމަލުތައް ހިންގާ ފަރާތްތަކަށް ކުރިއަށް އޮތް ތަނުގައި އެމަނިކުފާނު އުފައްދަވާ ސަރުކާރަކުން ފުރުސަތު ނުދެއްވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން ޔާމީން ވިދާޅުވީ، 2028 ވަނަ އަހަރުގެ ރިޔާސީ އިންތިހާބު ރައީސް މުއިއްޒަށް ކާމިޔާބު ކުރެއްވޭނެ މަންޒަރެއް ފެނިވަޑައިނުގަންނަވާ ކަމަށެވެ. އަދި އިންތިހާބުގައި ރައީސް މުއިއްޒު ރައީސް ޔާމީނަށް ތާއީދު ކުރެއްވުމަކީ ރައީސް މުއިއްޒުގެ އަމިއްލަ އިހުތިޔާރުގައި އޮތް ކަމެއް ކަމަށާއި، އެފަދަ ހާލަތެއްގައި ވެސް ހިޔާނާތުގެ އަމަލުތަކުގައި ބައިވެރިވާ އިސް ބޭފުޅުންނަށް އެމަނިކުފާނުގެ އަރިހުން ޖާގަ ނުލިބޭނެ ކަމަށް ތަކުރާރުކޮށް ވިދާޅުވިއެވެ.
ޔާމީން އިތުރަށް ވިދާޅުވީ އެމަނިކުފާނު ފާޑުވިދާޅުވަނީ ރައީސް މުއިއްޒުގެ ސިޔާސަތުތަކަށް ކަމަށާއި، ނަމަވެސް ވައްކަން ކުރަން އުޅޭ ބޮޑެތި މީހުންނަށް އިންތިހާއަށް ނަފުރަތު ކުރައްވާ ކަމަށެވެ. އަދި ޕީޕީއެމް/ޕީއެންސީގެ ކުރީގެ އަދި މިހާރުގެ ބައެއް ބޭފުޅުންނަށް އަލުން ފުރުސަތު ދިނުމަކީ ރަނގަޅު ކަމެއް ކަމުގައި ދެކެވަޑައިގަންނަވާ ކަމަށާއި، އެމަނިކުފާނުގެ ކުރިމަގުގެ ކެބިނެޓުގައި ޒުވާނުންނަށް އިސްކަންދެއްވާނެ ކަމަށް ވެސް ވިދާޅުވިއެވެ.
ރައީސް މުއިއްޒާ މެދު އެއްވެސް ރުޅިވެރިކަމެއް ނެތްކަން ހާމަކުރައްވަމުން ޔާމީން ވިދާޅުވީ، އެމަނިކުފާނުގެ ނުރުހުން އޮތީ ހަމައެކަނި ނާއިންސާފުން ޖަލަށްލީ ކުރީގެ ރައީސް އިބްރާހީމް މުހައްމަދު ސޯލިހާ މެދު ކަމަށެވެ. ރައީސް މުއިއްޒަކީ އަނިޔާވެރި ބޭފުޅެއް ކަމަށް ގަބޫލުނުކުރައްވާ ކަމަށާއި، އެހެންކަމުން އެމަނިކުފާނު ޖަލަށް ގެންދަވާފާނެ ކަމަށް ގަބޫލުނުކުރައްވާ ކަމަށް ވެސް ޔާމީން ވިދާޅުވިއެވެ.