ލިއޮނަލް މެސީގެ އެންމެ އަގުބޮޑު އަދި ތާރީޚީ ފަސް ހަނދާނީ ތަކެތި
ހުސެއިން އާދަމް
ލިއޮނަލް މެސީގެ ކާމިޔާބު ފުޓްބޯޅަ ކެރިއަރުގައި ގިނަގުނަ ރެކޯޑުތަކާއި، ތަށިތަކާއި، ހަނދާނުން ފޮހެލަން ދަތި މޮޅު ކުޅުންތަކެއް ވަނީ ފެނިގެން ގޮސްފައެވެ. ބައިނަލްއަޤްވާމީ ފުޓްބޯޅައާ ދުރަށް ދިއުމަށް އޭނާ ނިންމި ނިންމުމަކީ އޭނާގެ ކުޅިވަރުގެ ހަޔާތް ނިމުމަކާ ގާތްވަމުންދާކަން ސަޕޯޓަރުންނަށް ހަނދާންކޮށްދިން ކަމެކެވެ.
މެސީ ކުޅޭ މަންޒަރު ބަލައިލުމުގެ ފުރުސަތު އަދިވެސް އޮތް ނަމަވެސް، އޭނާގެ ކެރިއަރުގެ އެންމެ ފާހަގަކޮށްލެވޭ ވަގުތުތަކާ ގުޅުންހުރި ތަކެތި ހޯދުމަކީ ކަލެކްޓަރުންނަށް އޭނާގެ ތާރީޚުގެ ބައެއް މިލްކުކުރުމަށް ލިބޭ ފުރުސަތެކެވެ.
މެސީގެ ކެރިއަރާ ގުޅުންހުރި، މިހާތަނަށް ވިއްކާލާފައިވާ އެންމެ ތަފާތު އަދި އަގުބޮޑު ފަސް ހަނދާނީ ފޮއްޗެއް 'ގޯލް' އިން މިވަނީ ފާހަގަކޮށްފައެވެ. މީގެ ތެރޭގައި އާދައިގެ މެޗު ޓިކެޓަކުން ފެށިގެން، ބާސެލޯނާއަށް މެސީ ސޮއިކުރުމުގައި ބޭނުންކުރި ނެޕްކިންވެސް ހިމެނެއެވެ.
މެސީގެ ފުރަތަމަ ސީނިއާ މެޗުގެ ޓިކެޓް
49,200 ޑޮލަރު16 ނޮވެމްބަރު 2003 ގައި، ޕޯޓޯގެ އެސްޓާޑިއޯ ދޫ ޑްރަގާއޯގައި ބާސެލޯނާއާއި ޕޯޓޯ ބައްދަލުކުރި ރަހުމަތްތެރިކަމުގެ މެޗަކީ އާ ސްޓޭޑިއަމެއް ހުޅުވުމަށް ކުޅުނު މެޗެކެވެ. ނަމަވެސް، އެ މެޗު ވެގެންދިޔައީ ދުނިޔޭގެ އެންމެ މޮޅު އެއް ކުޅުންތެރިޔާގެ ސީނިއާ ފުރަތަމަ ފެނިލުން ފެނިގެންދިޔަ ތާރީޚީ މެޗަކަށެވެ.
މެޗުގެ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި މެސީ ކުޅެން އެރިއިރު، އޭނާގެ ފާހަގަކޮށްލެވޭ ހުނަރުވެރިކަން އެ ދުވަހުވެސް ދެއްކިއެވެ. ބާސެލޯނާ އެ މެޗުން 2-0 އިން ބަލިވި ނަމަވެސް، އެއީ މެސީގެ ފުރަތަމަ ސީނިއާ މެޗަށް ވުމުން އެ މެޗުގެ އަގު ބޮޑުވެގެންދިޔައެވެ.
އެ މެޗުގެ ޓިކެޓްތަކަކީ މިހާރު ކަލެކްޓަރުންގެ މެދުގައި ވަރަށް ބޮޑު މަގުބޫލުކަމެއް ލިބިފައިވާ އެއްޗެކެވެ. 'ކަލެކްޓާސް ޓޫލްސް' އިން ބުނާ ގޮތުގައި، މި މެޗުގެ 229 ޓިކެޓެއް މިހާތަނަށް ގްރޭޑް ކުރެވިފައިވެއެވެ. މީގެ ތެރެއިން ޕީ.އެސް.އޭ 7 ގްރޭޑްގެ ޓިކެޓެއް 'ގޯލްޑިން' މެދުވެރިކޮށް 49,200 ޑޮލަރަށް ވަނީ ވިއްކާލާފައެވެ.
2017 ވަނަ އަހަރުގެ "ރެމޮންޓާޑާ" މެޗުގައި މެސީ ބޭނުންކުރި ޖާޒީ
200,000 އާއި 400,000 ޑޮލަރާ ދެމެދުޗެމްޕިއަންސް ލީގުގެ ތާރީޚުގައި 2017 ވަނަ އަހަރު ބާސެލޯނާއިން ޕީ.އެސް.ޖީ އަތުން 6-1 އިން ހޯދި މޮޅަށްވުރެ ވަކިން މަޝްހޫރު މެޗެއް މަދުވާނެއެވެ.
ފުރަތަމަ ލެގުން 4-0 އިން ބަލިވެފައި އޮއްވައި، ބާސެލޯނާއިން ދެއްކި މި ހައިރާންކުރުވަނިވި ކުޅުމަކީ ޗެމްޕިއަންސް ލީގުގެ ތާރީޚުގައި ފެނިގެންދިޔަ އެންމެ ބޮޑު އެނބުރި އައުމެވެ. މެސީ އެ މެޗުގެ ހަތަރުވަނަ ލަނޑު ކާމިޔާބުކޮށް، ޓީމަށް ބޮޑު އެހީތެރިކަމެއް ފޯރުކޮށްދިނެވެ. "ލާ ރެމޮންޓާޑާ" ގެ ނަމުން މަޝްހޫރުވެފައިވާ މި މެޗަކީ ފުޓްބޯޅައިގެ ތާރީޚީ ވަގުތެކެވެ.
މި މެޗުގައި މެސީ ލައިގެން ކުޅުނު ޖާޒީ ފަހުން ވަނީ 'ސޮތެބީސް' ނީލަމެއްގައި ވިއްކާލަން ހުށަހަޅާފައެވެ. ޕީ.އެސް.އޭ އިން ވަނީ ފޮޓޯތަކުގެ އެހީގައި އެއީ ހަމަ އެ މެޗުގައި މެސީ ބޭނުންކުރި ޖާޒީކަން ކަށަވަރުކޮށްދީފައެވެ. މި ޖާޒީގެ އަގު 200,000 އާއި 400,000 ޑޮލަރާ ދެމެދުގެ އަގަކަށް އުފުލިގެން ދިޔައީ އެ މެޗުގެ ތާރީޚީ މުހިންމުކަމުންނެވެ.
ޕެލޭގެ ރެކޯޑު މުގުރާލި މެޗުގައި މެސީ ބޭނުންކުރި ބޫޓު
169,000 ޑޮލަރުމެސީގެ ކެރިއަރަކީ ގިނަގުނަ ރެކޯޑުތައް މުގުރާލުމުގެ ތާރީޚެކެވެ. މީގެ ތެރޭގައި ބްރެޒިލްގެ ލެޖެންޑް ޕެލޭގެ ރެކޯޑުތައްވެސް ހިމެނެއެވެ.
22 ޑިސެމްބަރު 2020 ގައި މެސީ ބާސެލޯނާއަށް ކާމިޔާބުކޮށްދިން 644 ވަނަ ލަނޑާއެކު، އެއް ކްލަބަކަށް އެންމެ ގިނަ ލަނޑު ޖެހުމުގެ ޕެލޭގެ ރެކޯޑު އޭނާ މުގުރާލިއެވެ. އެ މެޗުގައި މެސީ ބޭނުންކުރި އެޑިޑާސް ބޫޓަކީ ތާރީޚީ އެއްޗަކަށް ވެގެންދިޔައެވެ. މެސީ ވަނީ އެ ބޫޓު ނީލަން ކިޔައިގެން ލިބޭ ފައިސާ ބާސެލޯނާގެ ހޮސްޕިޓަލަކަށް ހަދިޔާކޮށްފައެވެ.
މި ބޫޓު 'ކްރިސްޓީސް' މެދުވެރިކޮށް 169,000 ޑޮލަރަށް ވިއްކާލިއެވެ. މި ބޫޓުގައި މެސީގެ އަނބިމީހާއާއި ދަރިންގެ ނަންތައް ލިޔެފައި ހުރުމުން، މިއީ ހަމައެކަނި ކުޅިވަރު ސާމާނަކަށްވުރެ ބޮޑަށް އޭނާގެ އަމިއްލަ ދިރިއުޅުމާވެސް ގުޅިފައިވާ އެއްޗެކެވެ.
ބާސެލޯނާގެ މަޝްހޫރު ނެޕްކިން ކޮންޓްރެކްޓް
964,450 ޑޮލަރުމި ލިސްޓުގައި ހިމެނޭ އެންމެ އާދަޔާޚިލާފު، އެހެނަސް އެންމެ މުހިންމު އެއްޗަކީ އާދައިގެ ނެޕްކިންއެކެވެ.
2000 ވަނަ އަހަރު، އުމުރުން 13 އަހަރުގެ މެސީ ބާސެލޯނާއާ ގުޅުމަށް މަސައްކަތް ކުރަމުންދިޔަ ދުވަސްވަރު، އެ ކްލަބުގެ ސްޕޯޓިންގް ޑިރެކްޓަރު ކާލްސް ރެކްސެކް ވަނީ މެސީއާއެކު އެއްބަސްވުމަކަށް އައިސްފައެވެ. މި އެއްބަސްވުން ލިޔެފައިވަނީ މެންދުރުގެ ކެއުމެއްގެ ތެރޭގައި އޮތް ނެޕްކިންއެއްގައެވެ.
އެ ދުވަހު އެ ކަރުދާސްކޮޅުގެ މުހިންމުކަން އެކަކަށްވެސް ނޭނގެއެވެ. ނަމަވެސް އެއީ ބާސެލޯނާގެ ތާރީޚު ބަދަލުކޮށްލި ކަރުދާސްކޮޅެވެ. މި ނެޕްކިން 2024 ވަނަ އަހަރު ނީލަމެއްގައި 964,450 ޑޮލަރަށް ވަނީ ވިއްކާލާފައެވެ. މިއީ މެސީގެ ކެރިއަރު ބިނާވުމުގައި އެންމެ މުހިންމު ދައުރެއް އަދާކުރި ތާރީޚީ ލިޔުމެވެ.
2022 ވަނަ އަހަރުގެ ވޯލްޑް ކަޕްގައި މެސީ ބޭނުންކުރި ހަ ޖާޒީ
މި ލިސްޓުގެ އެންމެ ކުރީގައި އުޅެނީ 2022 ވަނަ އަހަރުގެ ގަތަރު ވޯލްޑް ކަޕްގައި އާޖެންޓީނާއަށް ކާމިޔާބު ހޯދައިދިނުމުގައި މެސީ ބޭނުންކުރި ހަ ޖާޒީއެވެ. މިއީ މެސީގެ ކެރިއަރުގައި އެންމެ ބޮޑު އުންމީދެއް ކުރި ކާމިޔާބީއެވެ.
މި ކަލެކްޝަންގައި މެސީ މެކްސިކޯ، ނެދަލެންޑްސް އަދި ފްރާންސާ ދެކޮޅަށް ކުޅުނު މެޗުތަކުގައި ބޭނުންކުރި ޖާޒީތައް ހިމެނެއެވެ. މީގެ ތެރޭގައި ފައިނަލް މެޗުގެ ފުރަތަމަ ހާފުގައި އޭނާ ލައިގެން ހުރި ޖާޒީވެސް ހިމެނެއެވެ. މި ހަ ޖާޒީ 2023 ވަނަ އަހަރު ވިއްކާލާފައިވަނީ 7.8 މިލިއަން ޑޮލަރަށެވެ. މިއީ މެސީގެ ކެރިއަރުގެ އެންމެ މަތިވެރި ކާމިޔާބީއާ ގުޅިފައިވާ އެންމެ އަގުބޮޑު ހަނދާނީ ބައެއް ތަކެއްޗެވެ.
މި ފަސް އެއްޗަކީ މެސީގެ ފުޓްބޯޅަ ހަޔާތުގެ އެކި މަރުހަލާތައް ދައްކުވައިދޭ ތަކެއްޗެވެ. ފުރަތަމަ މެޗުގެ ޓިކެޓުން ފެށުން ދައްކައިދޭއިރު، ނެޕްކިން އިން ދައްކައިދެނީ އޭނާގެ ކުރިމަގު ކަނޑައެޅުނު ވަގުތެވެ. ރެކޯޑު މުގުރާލި ބޫޓާއި "ރެމޮންޓާޑާ" ޖާޒީން އޭނާގެ ހުނަރުވެރިކަން ފެންނައިރު، ވޯލްޑް ކަޕް ޖާޒީތަކަކީ އޭނާގެ ކާމިޔާބީގެ ތާޖެވެ. މިއީ ހަމައެކަނި ކުޅިވަރުގެ ސާމާނެއް ނޫނެވެ؛ މިއީ ފުޓްބޯޅައިގެ ރަންޒަމާނެއްގެ ހަނދާންތަކެވެ.