ނެގްރެއިރާ މައްސަލަ: ބާސެލޯނާ އާއި ރެއާލް މެޑްރިޑްގެ ކޯޅުން ބޮޑުވަނީ!

ސްޕެއިންގެ ކުރީގެ ރެފްރީ އޮފިޝަލަކަށް ފައިސާ ދެއްކި މައްސަލައިގައި ކުރިއަށްދާ ތަޙުޤީޤާ ގުޅިގެން، ބާސެލޯނާ އާއި ރެއާލް މެޑްރިޑާ ދެމެދު އޮތް ނުތަނަވަސްކަން އިތުރަށް ބޮޑުވެ، ސްޕެއިން ފުޓްބޯޅައިގެ ދެފުށްފެންނަ މިންވަރާއި އިންސާފުވެރިކަމާމެދު ވަނީ ސުވާލު އުފެދިފައެވެ.

2026-27 ވަނަ އަހަރުގެ ސީޒަންގެ ފުރަތަމަ އެލް ކްލެސިކޯ މެޗާ ކުރިމަތިލާއިރު، ގިނަ ދުވަސްތަކެއް ވެފައިވާ ނެގްރެއިރާ މައްސަލައިގެ ސަބަބުން ދެފަރާތުގެ ތުހުމަތުތަކާއި، ޤާނޫނީ އަރާރުންތަކާއި، ދެ ކްލަބުގެ ދެމެދުގައި އޮތް ގުޅުމުގެ މައްސަލަތައް އިތުރަށް ގޯސްވެ، ބާސެލޯނާ އާއި ރެއާލް މެޑްރިޑްގެ ވާދަވެރިކަން މިވަނީ އަނެއްކާވެސް ވަރަށް ބޮޑަށް ހޫނުވެފައެވެ.

މި މައްސަލަ މައިގަނޑު ގޮތެއްގައި ބިނާވެފައިވަނީ، ސްޕެއިން ފުޓްބޯޅަ ފެޑެރޭޝަންގެ ޓެކްނިކަލް ކޮމިޓީ އޮފް ރެފްރީސް (ސީ.ޓީ.އޭ) ގެ ކުރީގެ ނައިބު ރައީސް ހޯސޭ މާރިއާ އެންރީކޭޒް ނެގްރެއިރާއާ ގުޅުންހުރި ކުންފުނިތަކަކަށް ބާސެލޯނާއިން މިލިއަނުން ޔޫރޯ ދައްކާފައިވާ މައްސަލައިގެ މައްޗަށެވެ. ބާސެލޯނާއިން ބުނަމުންދަނީ އެއީ ޤާނޫނީ ހަމަތަކުގެ މަތިން ހޯދި ކޮންސަލްޓެންސީ ޚިދުމަތްތަކަކަށް ދެއްކި ފައިސާ ކަމަށެވެ. ނަމަވެސް ރެއާލް މެޑްރިޑުން ދެކޭގޮތުގައި މި އިންތިޒާމަކީ ފުޓްބޯޅަ މުބާރާތްތަކުގެ އިންސާފުވެރިކަމާމެދު ވަރަށް ސީރިއަސް ކަންބޮޑުވުންތަކެއް އުފެދޭ ކަމެކެވެ.

މި މައްސަލަ ފެށިގެން އައި ގޮތް

މި މައްސަލަ ފުރަތަމަ ފަޅާއެރީ 2023 ވަނަ އަހަރުގެ ފެބްރުއަރީ މަހުގައެވެ. އެއީ 2016 އާއި 2018 އާ ދެމެދު، ނެގްރެއިރާގެ ހިއްސާ އޮންނަ ކުންފުންޏެއް ކަމަށްވާ 'ޑަސްނިލް 95' އަށް ބާސެލޯނާއިން ގާތްގަނޑަކަށް 1.4 މިލިއަން ޔޫރޯ ދައްކާފައިވާ ކަމަށް ސްޕެއިންގެ ރޭޑިއޯ ސްޓޭޝަނެއް ކަމަށްވާ ކަޑޭނާ ސާރ އިން ރިޕޯޓްކުރުމާ ގުޅިގެންނެވެ.

އެ ދުވަސްވަރަކީ ނެގްރެއިރާ ސީ.ޓީ.އޭ ގެ ނައިބު ރައީސްކަމުގެ މަޤާމުގައި ހުންނެވި ދުވަސްވަރެވެ. ފަހުން އައި ރިޕޯޓްތަކުގައި ތުހުމަތުކޮށްފައިވާ ގޮތުގައި، މި ފައިސާ ދައްކާފައިވަނީ މެޗުތަކުގައި ރެފްރީންގެ ނިންމުންތައް ބާސެލޯނާއާ ދެކޮޅަށް ނުދާނެކަން ކަށަވަރުކުރުމަށެވެ.

ރެފްރީންނަށް ރިޝްވަތު ދިން ކަމަށް ކުރެވޭ ތުހުމަތުތައް ބާސެލޯނާއިން ދޮގުކުރިއެވެ. އަދި ބުނެފައިވަނީ، އެ ކްލަބުން ބޭރުގެ ކޮންސަލްޓަންޓެއް ހަމަޖެއްސީ ޒުވާން ކުޅުންތެރިންނާއި ޕްރޮފެޝަނަލް ރެފްރީންނާ ބެހޭ ޓެކްނިކަލް ރިޕޯޓްތައް ތައްޔާރުކުރުމަށް ކަމަށެވެ. އަދި މިއީ ޕްރޮފެޝަނަލް ފުޓްބޯޅައިގައި އާންމުކޮށް ކަންކުރާ އުސޫލު ކަމަށްވެސް އެ ކްލަބުން ބުންޏެވެ.

ބާސެލޯނާގެ ކުރީގެ ރައީސް ޖޯސެޕް މާރިއާ ބާޓޮމެއު ވިދާޅުވީ، އެ ފައިސާ ދައްކަން ފަށާފައިވަނީ މަދުވެގެން 2003 ވަނަ އަހަރު ކަމަށާއި، އެކަން ހުއްޓާލީ ނެގްރެއިރާ ރެފްރީ ކޮމިޓީގެ މަޤާމުން ވަކިވެވަޑައިގަތުމާ ގުޅިގެން 2018 ވަނަ އަހަރުގެ ޖޫން މަހުގައި ކަމަށެވެ. އެހެން ނަމަވެސް ބައެއް އެހެން ރިޕޯޓްތައް ބުނާގޮތުގައި މި މުއާމަލާތްތައް ފެށިފައިވަނީ 2001 ވަނަ އަހަރުގެ ކުރީކޮޅުގައެވެ.

ފަހުން ޕްރޮސެކިއުޓަރުން ވަނީ 7.3 މިލިއަން ޔޫރޯއަށް ވުރެ ގިނަ ފައިސާގެ މުއާމަލާތްތަކެއް ހިނގާފައިވާކަން ފާހަގަކޮށްފައެވެ. އަދި އޭނާގެ ކުންފުންޏަށް ފައިސާ ދިނުން އަލުން ނުފަށައިފިނަމަ، ހިނގާފައިވާ ޤަވާޢިދާ ޚިލާފު ކަންތައްތައް ފަޅާއަރުވާލާނެ ކަމަށް ބުނެ ނެގްރެއިރާ އިންޒާރު ދީފައިވާ ކަމުގެ ރިޕޯޓްތަކެއްވެސް ވަނީ ފެންމަތިވެފައެވެ.

މި ހާމަވުންތަކާ ގުޅިގެން، އެ ފައިސާއަކީ ހަޤީޤީ ކޮންސަލްޓެންސީ ފީއެއްތޯ ނުވަތަ މެޗުތަކުގައި ވަކި ފަރާތަކަށް ޖެހިގެން ނިންމުންތައް ނިންމުމަށް ދެއްކި ފައިސާތޯ ބެލުމަށް ޖިނާއީ ތަޙުޤީޤެއް ވަނީ ފަށާފައެވެ.

ކޮރަޕްޝަންގެ ތުހުމަތުތައް ބާސެލޯނާއިން ދޮގުކުރޭ

ބާސެލޯނާގެ ރައީސް ޖޯއާން ލަޕޯޓާ ވަނީ އެ ކްލަބުން އެއްވެސް އިރެއްގައި ރެފްރީންނަށް ފައިސާ ދީފައި ނުވާނެ ކަމަށާއި، އަދި މެޗުތަކުގެ ނަތީޖާއަށް ނުފޫޒު ފޯރުވަން މަސައްކަތް ކޮށްފައި ނުވާނެ ކަމަށް ތަކުރާރުކޮށް ވިދާޅުވެފައެވެ.

2023 ވަނަ އަހަރުގެ މާރިޗު މަހު ލަޕޯޓާ ވިދާޅުވީ، މި މައްސަލަ ބޭނުންކުރަމުން ދަނީ ބާސެލޯނާގެ އަގު ވައްޓާލުމަށް ކަމަށެވެ. އަދި އިންވެސްޓްމަންޓް ފާމެއް ކަމަށްވާ ސީ.ވީ.ސީ އާއެކު ލަލީގާއިން ހަދަން އުޅުނު އެއްބަސްވުމާ ދެކޮޅަށް ބާސެލޯނާއިން ތެދުވުމާއި، ޔޫރަޕިއަން ސުޕަ ލީގު މަޝްރޫޢުގައި އެ ކްލަބު ބައިވެރިވުމާ ގުޅިގެން އުފެދިފައިވާ ނުތަނަވަސްކަމަކީ މިކަމުގެ ސަބަބެއް ކަމަށް އޭނާ ފާހަގަކުރެއްވިއެވެ.

މީގެ އިތުރުން، ލަލީގާގެ ރައީސް ހާވިއޭ ޓެބާސް، ބާސެލޯނާއާ މެދު ޢަދާވާތްތެރިކަން ދައްކަވާ ކަމަށްވެސް ލަޕޯޓާ ތުހުމަތު ކުރެއްވިއެވެ. މި މައްސަލަ އިތުރަށް ގޯސްވެގެން ދިޔައީ، ޓެބާސް ޕްރޮސެކިއުޓަރުންނަށް އޮޅުވާލުންތަކެއް އެކުލެވޭ ހެކިތަކެއް ހުށަހެޅުއްވި ކަމަށް ބުނެ ރިޕޯޓެއް ޢާންމުވުމާ ގުޅިގެންނެވެ. ޓެބާސް އެ ތުހުމަތު ދޮގުކުރެއްވި ނަމަވެސް، ބާސެލޯނާއިން ވަނީ އޭނާ ކްލަބާ ދެކޮޅަށް ހިންގާ ކެމްޕޭނަކަށް ވާގިވެރިވެދެއްވާ ކަމަށް ބުނެ، އޭނާގެ އިސްތިޢުފާއަށް ގޮވާލާފައެވެ.

މި މައްސަލަ ފަހުން ބޮޑުވެގެން ދިޔައީ ބާސެލޯނާއާއި، ލަލީގާއާއި، ރެއާލް މެޑްރިޑް ހިމެނޭ ދެބަސްވުމަކަށެވެ. އަދި ކޮންމެ ފަރާތަކުންވެސް އަނެއް ފަރާތުގެ ނިޔަތާއި އަމަލުތަކާމެދު ސުވާލު އުފެއްދިއެވެ.

ޖިނާއީ ދައުވާތަކާއި ރިޝްވަތުގެ ތުހުމަތު

މާރިޗު 2023 ގައި، ސްޕެއިންގެ ޕްރޮސެކިއުޓަރުން ވަނީ ބާސެލޯނާއާއި، އެ ކްލަބުގެ ކުރީގެ ރައީސުން ކަމަށްވާ ސަންދްރޯ ރޮސެލް އަދި ބާޓޮމެއު، އަދި ކްލަބުގެ އެހެން އިސްވެރިންނާ ދެކޮޅަށް މައްސަލައެއް ހުށަހަޅާފައެވެ. އެ މައްސަލައިގައި ތުހުމަތުކޮށްފައިވަނީ، މެޗުތަކުގައި ރެފްރީންގެ ފަރާތުން ފައިދާތަކެއް ހޯދުމަށްޓަކައި، ނެގްރެއިރާއާ އެކު ބާސެލޯނާއިން ސިއްރު އެއްބަސްވުމެއް ހަދާފައިވާ ކަމަށެވެ.

މި ތުހުމަތުތަކުގެ ތެރޭގައި ކުޅިވަރުގެ ކޮރަޕްޝަނާއި، ނާޖާއިޒު ފައިދާ ނެގުމުގެ އިދާރީ މައްސަލަތަކާއި، ވިޔަފާރީގެ ދޮގު ރެކޯޑުތައް ހެދުން ހިމެނެއެވެ. ސެޕްޓެމްބަރު 2023 ގައި، ތަހުގީގުގެ ބައެއްގެ ގޮތުގައި ފުލުހުން ވަނީ ސްޕެއިންގެ ފުޓްބޯޅަ ފެޑެރޭޝަންގެ އޮފީސްތައް ފާސްކޮށްފައެވެ.

އަދި އޭގެ ފަހުން ފަނޑިޔާރަކު ވަނީ، ރެފްރީންގެ އޮނިގަނޑުގައި ނެގްރެއިރާ އަދާކުރި ދައުރަށް ބަލައި އޭނާއަކީ ދައުލަތުގެ އޮފިޝަލެއްގެ ގޮތުގައި ބަލައިގަނެ، ރިޝްވަތުގެ ދައުވާ މައްސަލައަށް އިތުރުކޮށްފައެވެ. ނަމަވެސް، މެއި 2024 ގައި ބާސެލޯނާގެ ކޯޓަކުން ވަނީ ރިޝްވަތުގެ އެ ދައުވާ ބާތިލުކޮށްފައެވެ. ކޯޓުން ނިންމީ މި ކުށުގެ ބޭނުމަށް ބަލާއިރު ފެޑެރޭޝަނަކީ ދައުލަތުގެ އިދާރާއެއް ނޫން ކަމަށެވެ.

މި ނިންމުމުގެ ސަބަބުން ރިޝްވަތުގެ ތުހުމަތަށް އޮތް ގާނޫނީ އަސާސް އުނިވި ނަމަވެސް، ދެން ހުރި އެހެން ތުހުމަތުތަކާ ގުޅޭ މައިގަނޑު މައްސަލައަކަށް މިއަކުން އޮޓޮމެޓިކް ހައްލެއް ނުލިބުނެވެ. ބާސެލޯނާއިން އެ ނިންމުމަށް މަރުހަބާ ކިޔައި، އެ ކްލަބުން އަމަލުކޮށްފައިވަނީ ގާނޫނީ އިމުގެ ތެރޭގައި ކަމަށް ބުނާ ބުނުން ދެމެހެއްޓިއެވެ.

އަދި ފަހުން، ނެގްރެއިރާގެ އަލްޒައިމާސް ބަލި ބޮޑުވުމުގެ ސަބަބުން، ޝަރީއަތުގެ މަރުހަލާތަކުގައި ބައިވެރިވުމުގެ ސިއްހީ ގާބިލުކަން އޭނާގެ ކިބައިގައި ނެތް ކަމަށް ވަނީ ކަނޑައަޅާފައެވެ.

ރެއާލް މެޑްރިޑުން ޒިންމާދާރުކުރުވުމަށް އެދުން

މި އަމަލުތަކުގެ ސަބަބުން ގެއްލުން ލިބުނު ފަރާތެއްގެ ހައިސިއްޔަތުން ރެއާލް މެޑްރިޑުން މި ޝަރީއަތުގެ މައްސަލައިގެ ތެރެއަށް ވަނެވެ. މިއާއެކު ދެ ކްލަބުގެ ދެމެދުގައިވާ ވާދަވެރިކަން އިތުރަށް ގަދަވެގެން ދިޔައެވެ.

މިކަމަށް ރައްދުދެއްވަމުން ލަޕޯޓާ ވަނީ، ބާސެލޯނާއަށް ހަމަލާދިނުމަށް ރެއާލް މެޑްރިޑުން މި މައްސަލައިގެ ނާޖާއިޒު ފައިދާ ނަގަމުންދާ ކަމަށް ތުހުމަތުކުރައްވާފައެވެ. އަދި ރެއާލް މެޑްރިޑާއި ފްރެންސިސްކޯ ފްރެންކޯގެ ޚުދުމުޚުތާރު ވެރިކަމާ ދެމެދު އޮތް ގުޅުމުގެ މާޒީގެ ދެބަސްވުންތައް އޭނާ އަލުން ތިލަކުރައްވައި، ތާރީޚީ ގޮތުން ބަލާއިރު ރެއާލް މެޑްރިޑަކީ އަބަދުވެސް ސިޔާސީ އަދި އިގްތިސާދީ ބާރުތަކާ ގާތް ގުޅުމެއް އޮންނަ ޓީމެއް ކަމަށް ވިދާޅުވިއެވެ.

ރެއާލް މެޑްރިޑުން އެ ކްލަބުގެ ޓެލެވިޜަން ޗެނަލް މެދުވެރިކޮށް ރައްދުދީ، ލަޕޯޓާގެ ވާހަކަތަކަށް ގޮންޖަހައި، ފްރެންކޯގެ ވެރިކަމާ އެކު ބާސެލޯނާއިން މާޒީގައި ބޭއްވި ގުޅުންތައް ފާހަގަކުރިއެވެ. ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ތަކުރާރުކޮށް ވިދާޅުވަމުން ގެންދަވަނީ، ގިނަ އަހަރުތަކެއް ވަންދެން ރެފްރީންގެ އިސް އޮފިޝަލަކަށް ފައިސާ ދެއްކުމަކީ އިންސާފުވެރި ވާދަވެރިކަމާ ފުށުއަރާ ކަމެއް ކަމަށެވެ.

ނޮވެމްބަރު 2025 ގައި ބޭއްވި އެ ކްލަބުގެ އާންމު ޖަލްސާގައި ޕެރޭޒް ވިދާޅުވީ، މަދުވެގެން 17 އަހަރު ދުވަހުގެ މުއްދަތެއްގެ ތެރޭގައި ބާސެލޯނާއިން ނެގްރެއިރާއަށް 8 މިލިއަން ޔޫރޯއަށް ވުރެ ގިނަ ފައިސާ ދައްކާފައިވާ ކަމަށާއި، މިއީ އެ ކްލަބުގެ އެންމެ ކާމިޔާބު ބައެއް ސީޒަންތަކާ ދިމާވި ދުވަސްވަރެއް ކަމަށެވެ.

އަދި މެޗުތަކުގައި ރެފްރީންގެ ފަރާތުން ބާސެލޯނާއަށް ނާޖާއިޒު ފައިދާތަކެއް ލިބިފައިވޭތޯ ސުވާލު އުފެއްދުމަށް، ރަތް ކާޑު ދެއްކި އަދަދުތަކުގެ ތަފާސްހިސާބުތައްވެސް ޕެރޭޒް ފާހަގަކުރެއްވިއެވެ. ނަމަވެސް، ހަމައެކަނި މިފަދަ ތަފާސްހިސާބުތަކަކުން މެޗުތަކަށް ނުފޫޒު ފޯރުވާފައިވާކަން ސާބިތެއް ނުކުރެވެއެވެ.

ބާސެލޯނާއިން އަދިވެސް ބުނަމުންދަނީ އެ ފައިސާއަކީ ޓެކްނިކަލް ރިޕޯޓުތަކަކަށް ދެއްކި ފައިސާ ކަމަށާއި، ރެފްރީންގެ ފަރާތުން އެއްވެސް އިނާޔަތެއް ހޯދުމަށް އެދިފައި ނުވާނެ ކަމަށެވެ.

ޔުއެފާގެ މުރާޖައާ ކުރިއަށްދަނީ މާރިޗު 2023 ގައި ޔުއެފާއިން ވަނީ މި މައްސަލައިގެ އަމިއްލަ ތަހުގީގެއް ފަށާފައެވެ. އެ އިދާރާގެ ރައީސް، އަލެކްސަންޑަރ ޗެފެރިން ވަނީ މި ތުހުމަތުތަކަކީ ނުހަނު ސީރިއަސް ތުހުމަތުތަކެއްގެ ގޮތުގައި ސިފަކުރައްވާފައެވެ. ނަމަވެސް، ތަހުގީގު ކުރިއަށްދާތީ އެ މައްސަލައިގެ ހަގީގަތްތަކާ މެދު ވަކި އެއްޗެއް ވިދާޅުވާން އޭނާ އިންކާރުކުރެއްވިއެވެ.

އޮކްޓޫބަރު 2026 ގައި ރެއާލް މެޑްރިޑުން ޔޫއެފާއަށް އިތުރު ލިޔެކިޔުންތަކެއް ހުށަހަޅައި، އެ ތަކެތި އަވަހަށް ބަލައިދިނުމަށާއި، އެއްވެސް ގޯހެއް ހަދާފައިވާކަން ސާބިތުވެއްޖެނަމަ އެކަށީގެންވާ ފިޔަވަޅު އެޅުމަށް އެދުނެވެ.

ޔޫއެފާއިން ކަށަވަރުކޮށްދިން ގޮތުގައި އެ އިދާރާގެ އެތިކްސް އަދި ޑިސިޕްލިނަރީ ތަހުގީގުކުރާ ފަރާތްތަކަށް އެ ލިޔެކިޔުންތައް ލިބިފައިވާ ކަމަށާއި، މިހާރުވެސް ކުރިއަށްދާ މުރާޖައާގެ ތެރެއިން އެ ތަކެތި ވަޒަންކުރާނެ ކަމަށެވެ. އޭގެ ފަހުން ބާސެލޯނާއިން ސާފުކޮށްދިން ގޮތުގައި ޔޫއެފާއިން އާ ތަހުގީގެއް ނުފަށައެވެ. \

އެ ކްލަބުން ބުނީ 2023 ގައި ފެށި މައްސަލަ ބެލުން ދުވަހަކުވެސް ނިންމާލާފައި ނުވާ ކަމަށާއި، އަދި އިތުރަށް ހުށަހެޅި ތަކެތި ބަލާނީ މިހާރުވެސް ހިނގަމުންދާ މަރުހަލާގެ ތެރެއިން ކަމަށެވެ. މީގެއިތުރުން ބާސެލޯނާއިން ބުނީ ކަމާބެހޭ ފަރާތްތަކަށް އެއްބާރުލުން ދެމުން، އެ ކްލަބަށް ޔޫއެފާ ލައިސަންސް ލިބި، ޔޫރަޕުގެ މުބާރާތްތަކުގައި ވާދަކުރުމުގެ ފުރުސަތު މެދުކެނޑުމެއްނެތި ލިބެމުންދާ ކަމަށެވެ.

ތެބާސް އާއި މެޑްރިޑްގެ ކުރިމަތިލުން

މި މައްސަލައިގެ ސަބަބުން ޕެރޭޒް އާއި ތެބާސްގެ ދެމެދުގައި އޮތް ނުތަނަވަސްކަން އިތުރަށް ވަނީ ބޮޑުވެފައެވެ. ރެފްރީން ވަކިކޮޅަކަށް ޖެހޭކަމަށް ބުނާ ތުހުމަތުތައް ފެތުރުމަށާއި، ކްލަބަކީ އަނިޔާ ލިބޭ ފަރާތެއްގެ ގޮތުގައި ތަކުރާރުކޮށް ދެއްކުމަށް ރެއާލް މެޑްރިޑުން އެ ކްލަބުގެ ޓީވީ ޗެނަލް ބޭނުންކުރާ ކަމަށް ތެބާސް ވަނީ ތުހުމަތުކުރައްވާފައެވެ.

އޭނާ ވިދާޅުވީ ޝައްކުތައް ދައްކަމުން ދަނީ ސާބިތުވެފައިވާ ހަގީގަތްތަކެއްގެ ގޮތުގައި ކަމަށެވެ. ހޫނުވި އެއް ބަހުސެއްގައި، ތެބާސް ވަނީ މެޑްރިޑްގެ މުވާސަލާތީ އުކުޅުތައް ނާޒީ ޖަރުމަނުގެ ޖޯސެފް ގޮއެބެލްސްގެ ޕްރޮޕެގެންޑާ އުކުޅުތަކާ އަޅާކިޔުއްވާފައެވެ.

ނަމަވެސް، އޭނާގެ މި އަޅާކިޔުމަކީ ނާޒީ ފިކުރާ ގުޅުވައިގެން ކުރި ކަމެއް ނޫން ކަމަށާއި، އެއީ ހަމައެކަނި ޕްރޮޕެގެންޑާ ފެތުރުމުގެ އުކުޅުތަކަށް އިޝާރާތްކުރައްވައި ވިދާޅުވި އެއްޗެއް ކަމަށް އޭނާ ސާފުކޮށްދެއްވިއެވެ.

ރެއާލް މެޑްރިޑުން މި ވާހަކަތައް ކުށްވެރިކޮށް، ފުޓްބޯޅައިގެ އިސް ވެރިއެއްގެ ކިބައިން ފެންނަންޖެހޭ ވަކިފަރާތަކަށް ނުޖެހުމުގެ ސިފަ ތެބާސްގެ ކިބައިން ފެނިފައިނުވާ ކަމަށް ތުހުމަތުކޮށް، އޭނާ އިސްތިއުފާ ދެއްވުމަށް އަނެއްކާވެސް ގޮވާލިއެވެ.

ތެބާސް މި ގޮވާލުން ދޮގުކުރައްވައި ވިދާޅުވީ، ލަލީގާއިން އަމަލުކޮށްފައިވަނީ އެކަށީގެންވާ ގޮތެއްގައި ކަމަށާއި، ބާސެލޯނާއާ ދެކޮޅަށް ކުރެވޭ ތުހުމަތުތަކަކީ ވަކިވަކި ރެފްރީން ގޯހެއް ހަދާފައިވާކަމުގެ ހެއްކެއް ނޫން ކަމަށެވެ.

އެލް ކްލެސިކޯގެ ކުރިން ޖަވާބު ނުލިބޭ ސުވާލުތައް

ބާސެލޯނާ އާއި ރެއާލް މެޑްރިޑް ބައްދަލުކުރުމަށް ތައްޔާރުވަމުންދާއިރު، ނެގްރެއިރާ މައްސަލައަކީ އެ ދެ ޓީމުގެ ވާދަވެރިކަމުގައި އަދިވެސް އެންމެ ފާހަގަކޮށްލެވޭ މައްސަލައެވެ. ރެއާލް މެޑްރިޑުން ބުނަނީ މި ފައިސާގެ މުއާމަލާތްތަކުގެ ސަބަބުން ސްޕެއިންގެ ފުޓްބޯޅައަށް އޮތް އިތުބާރު ގެއްލޭ ކަމަށާއި، ވީ ގޮތެއް ކަމާބެހޭ ފަރާތްތަކުން ހޯދަންޖެހޭނެ ކަމަށެވެ.

ބާސެލޯނާއިން ދެކޭގޮތުގައި އެ ފައިސާއަކީ ގާނޫނީ ހަމަތަކުގެ މަތިން ހޯދި ކޮންސަލްޓެންސީ ޚިދުމަތްތަކަކަށް ދެއްކި ފައިސާއެވެ. އަދި ޝަރުއީ މަރުހަލާ ނުނިމެނީސް، އެ ކްލަބަކީ ކުށްވެރިއެއްގެ ގޮތުގައި ބޭއިންސާފުން ދައްކަމުންދާ ކަމަށްވެސް އެ ކްލަބުން ބުނެއެވެ.

މި މައްސަލައިގެ ސަބަބުން ސްޕެއިންގެ ފުޓްބޯޅައިގެ އިސް އިދާރާތަކުގެ މެދުގައި އޮތް ބޮޑެތި ބައިބައިވުންތައް ވަނީ ފަޅާއަރާފައެވެ. ބާސެލޯނާ، ރެއާލް މެޑްރިޑް އަދި ލަލީގާއިން ވެސް ދަނީ އެއްބަޔަކު އަނެއް ބަޔަކަށް އަމިއްލަ އެދުމަށް މަސައްކަތްކުރާ ކަމުގެ ތުހުމަތު ތަކުރާރުކޮށް ކުރަމުންނެވެ.

އެންމެ ފަހު ނަތީޖާއެއްގެ ގޮތުން، މި ފައިސާގެ މުއާމަލާތްތަކަކީ ފުޓްބޯޅައިގެ ގަވާއިދުތަކާ ނުވަތަ ޖިނާއީ ގާނޫނާ ޚިލާފު ކަމެއްތޯ ކަނޑައެޅުމުގައި ޝަރުއީ މަރުހަލާތަކާއި ޔޫއެފާގެ މިހާރުގެ މުރާޖައާ ވަރަށް މުހިންމު ދައުރެއް އަދާކުރާނެއެވެ.

މި ފައިސާގެ މުއާމަލާތްތަކުގެ ސަބަބުން ދެފުށް ފެންނަ މިންވަރާއި، މަސްލަހަތު ފުށުއެރުމާ ގުޅޭގޮތުން ސީރިއަސް ސުވާލުތަކެއް އުފެދިފައިވީ ނަމަވެސް، އެކަމުން އެކަނި ރެފްރީންނަށް ރިޝްވަތު ދިން ކަމެއް ނުވަތަ މެޗުތަކުގެ ނަތީޖާއަށް ނުފޫޒު ފޯރުވި ކަމެއް ސާބިތެއް ނުވެއެވެ.

މި ތަހުގީގު އަދިވެސް ވަކިކޮޅެއްގައި ނުޖެހި އޮތުމާއެކު، އެލް ކްލެސިކޯ އަނެއްކާވެސް މި ކުޅެވެނީ ގާނޫނީ ނުޔަގީންކަމާއި، ތުހުމަތުތަކާއި، އަދި ސްޕެއިންގެ ފުޓްބޯޅައިގެ އަގު ހިފެހެއްޓުމަށް ކުރެވޭ ހަނގުރާމައެއްގެ ތެރޭގައެވެ.