އިންޓިމޭޓް "ޑީޕްފޭކް" ފޮޓޯތަކުގެ މައްސަލަ ހައްލުކުރުމަށް އިނގިރޭސިވިލާތުން އެކްސް އަށް ބާރުއަޅަނީ

އީލޮން މަސްކްގެ އެކްސް ޕްލެޓްފޯމުގައި ހިމެނޭ އޭއައި ޗެޓްބޮޓް "ގްރޮކް" ބޭނުންކޮށްގެން އުފައްދާ އިންޓިމޭޓް "ޑީޕްފޭކް" ފޮޓޯތައް އިތުރުވަމުންދާ މައްސަލަ އަވަސް ފިޔަވަޅުތަކެއް އަޅައިގެން ހައްލުކުރުމަށް އިނގިރޭސިވިލާތުން ގޮވާލައިފިއެވެ.

އަންގާރަ ދުވަހު މިކަމާ ގުޅޭގޮތުން ވާހަކަދައްކަވަމުން އިނގިރޭސިވިލާތުގެ ޓެކްނޮލޮޖީ މިނިސްޓަރ ކެންޑަލް ވިދާޅުވީ، ގްރޮކް ބޭނުންކޮށްގެން އަންހެނުންނާއި ކުޑަކުދިންގެ ބަރަހަނާ ފޮޓޯތައް އުފައްދަމުންދާ ކަމުގެ ރިޕޯޓްތައް ލިބެމުންދާ ކަމަށެވެ. "އަމިއްލަ ނަފްސުގެ އިންޓިމޭޓް ޑީޕްފޭކް ފޮޓޯތަކެއް އިންޓަނެޓުން ފެނުމުގެ ހިތްދަތި ތަޖުރިބާ އެއްވެސް މީހަކު ކުރާކަށް ނުޖެހޭނެ،" ކެންޑަލް ވިދާޅުވިއެވެ. "އަންހެނުންނާއި އަންހެން ކުދިންނަށް އަމާޒުކޮށްގެން އުފައްދާ މިފަދަ ދަށު ދަރަޖައިގެ ފޮޓޯތައް ފެތުރުމަށް އަޅުގަނޑުމެން ފުރުސަތެއް ނުދޭނަން."

"އެކްސް އިން މި މައްސަލަ ވަރަށް އަވަހަށް ހައްލުކުރަންޖެހޭ،" ކެންޑަލް ވިދާޅުވިއެވެ. ކެންޑަލްގެ މި ބަޔާނާ ގުޅިގެން އެކްސް އިން އަދި ވަކި އެއްޗެއް ބުނެފައެއް ނުވެއެވެ.

ނަމަވެސް، އެކްސްގެ ސޭފްޓީ އެކައުންޓުން އާދީއްތަ ދުވަހު ބުނެފައިވަނީ ޣައިރު ގާނޫނީ ހުރިހާ ކޮންޓެންޓެއް އުނިކުރަމުންދާ ކަމަށާއި، އެފަދަ ކަންކަމުގައި ބައިވެރިވާ އެކައުންޓްތައް ދާއިމީކޮށް ސަސްޕެންޑް ކުރާނެ ކަމަށެވެ. "ޣައިރު ގާނޫނީ ކޮންޓެންޓް އުފެއްދުމަށް ގްރޮކް ބޭނުންކުރާ ކޮންމެ މީހަކަށްވެސް، އެފަދަ ކޮންޓެންޓް އަޕްލޯޑް ކުރާ މީހުންނަށް ލިބޭ ފަދަ އަދަބުތައް ލިބޭނެ،" އެކްސް އިން ބުންޏެވެ.

މިކަމާ ގުޅޭގޮތުން ރޮއިޓާސް ނިއުސް އެޖެންސީން ސުވާލުކުރުމުން އެކްސް އިން ބުނީ "ކުރީގެ މީޑިއާތަކުން ހަދަނީ ދޮގު" ކަމަށެވެ.

އިނގިރޭސިވިލާތުގެ ގާނޫނު ބުނާގޮތުން، މީހެއްގެ ނުރުހުމުގައި އިންޓިމޭޓް ފޮޓޯ ނުވަތަ ކުޑަކުދިންނަށް ޖިންސީ ގޯނާކުރާ މަންޒަރު ދައްކުވައިދޭ ފޮޓޯ (އޭއައި އިން އުފައްދާ ފޮޓޯ ހިމެނޭހެން) އުފެއްދުމާއި ހިއްސާކުރުމަކީ ކުށެކެވެ. މީގެ އިތުރުން، ޓެކްނޮލޮޖީ ޕްލެޓްފޯމްތަކުން އިނގިރޭސިވިލާތުގެ ޔޫސާސްއަށް މިފަދަ ކޮންޓެންޓް ނުފެންނާނެ ގޮތް ހަދައި، އެފަދަ އެއްޗެއް ފާހަގަވުމާއެކު އުނިކުރަން ޖެހެއެވެ.

މަސްކް ވަނީ މި ކަންބޮޑުވުންތަކަށް މަލާމާތްކޮށް، މަޝްހޫރު މީހުންގެ އެޑިޓްކޮށްފައިވާ ފޮޓޯތަކަށް ރައްދުދީ އިމޯޖީތައް ޕޯސްޓްކޮށްފައެވެ.

ހޯމަ ދުވަހު ޔޫރަޕިއަން ކޮމިޝަނުން ބުނީ އެކްސް އިން "ސްޕައިސީ މޯޑް" އެއް ފޯރުކޮށްދޭކަން އެނގޭ ކަމަށާއި، އެފަދަ ފޮޓޯތަކަކީ ޣައިރު ގާނޫނީ އެއްޗެހި ކަމަށް ބުނެ އެކަން ކުށްވެރިކުރާ ކަމަށެވެ.

ހަމަ އެދުވަހު، އިނގިރޭސިވިލާތުގެ މީޑިއާ ރެގިއުލޭޓަރު އޮފްކޮމް އިން ބުނީ، އިނގިރޭސިވިލާތުގެ ޔޫސާސް ރައްކާތެރިކުރުމަށް ގާނޫނީ ގޮތުން އަޅަންޖެހޭ ފިޔަވަޅުތައް ދެނެގަތުމަށް އެކްސް އާއި އެކްސްއޭއައި އާ "ކުއްލި ގޮތަކަށް ގުޅާފައިވާ" ކަމަށެވެ.

ފްރާންސްގެ އޮފިޝަލުން ވަނީ މި ކޮންޓެންޓަކީ "ސާފުކޮށް ޣައިރު ގާނޫނީ" އެއްޗެއް ކަމަށް ބުނެ މައްސަލަ ޕްރޮސިކިއުޓަރުންނަށް ހުށަހަޅާފައެވެ. އަދި އިންޑިއާގެ ކަމާބެހޭ ފަރާތްތަކުން ވެސް ވަނީ މިކަމުގެ ތަފްސީލަށް އެދިފައެވެ. އެމެރިކާގެ ރެގިއުލޭޓަރުން އަދި މިކަމާ ގުޅޭގޮތުން އެއްޗެއް ބުނެފައެއް ނުވެއެވެ.

ގްރޮކް އިން އުފައްދާ ކޮންޓެންޓާ ގުޅިގެން މީގެ ކުރިން ވެސް ގިނަ ފާޑުކިޔުންތަކެއް އަމާޒުވެފައިވެއެވެ. އޭގެ ތެރޭގައި ދޮގު މައުލޫމާތު ފެތުރުމާއި، އެމެރިކާގެ އިންތިޚާބުގެ ކުރިން ސިޔާސީ ވެރިންގެ ޑީޕްފޭކް އުފެއްދުމާއި، އަދި ނަސްލީ ތަފާތުކުރުންތަކަށް ހިތްވަރުދޭ ކޮންޓެންޓް އުފެއްދުން ހިމެނެއެވެ.