އީރާނުން އެމެރިކާގެ މުހިންމު ޖާސޫސީ ބޯޓެއް ހަލާކުކޮށްލައިފި

އީރާނުން އެމެރިކާގެ މުހިންމު ޖާސޫސީ ބޯޓެއް ހަލާކުކޮށްލައިފިއެވެ.

އެމެރިކާގެ މީޑިއާ ރިޕޯޓްތަކާއި އޮންލައިންކޮށް ދައުރުވަމުންދާ އާ ފޮޓޯތަކުން އެނގޭ ގޮތުގައި، ސައުދީ އަރަބިއްޔާގެ ޕްރިންސް ސުލްތާން އެއާ ބޭސްއަށް އީރާނުން ދިން ހަމަލާގައި 270 މިލިއަން ޑޮލަރުގެ ބޮއިންގް E-3 ސެންޓްރީ AWACS މޮނިޓަރިންގް މަތިންދާބޯޓެއް ވަނީ ހަލާކުކޮށްލާފައެވެ.

މި ހަމަލާގައި އިތުރު ބައެއް މަތިންދާބޯޓުތަކަށް ގެއްލުންވެ، އެމެރިކާގެ މަދުވެގެން 12 ސިފައިން ވަނީ ޒަޚަމްވެފައެވެ.

އެއާ އެންޑް ސްޕޭސް ފޯސަސް މެގަޒިންއިން ލިޔެފައިވާ ގޮތުގައި، ބޯޓަށް ލިބިފައިވާ ގެއްލުންތަކުގެ ބޮޑުމިނަށް ބަލާއިރު އެ ބޯޓު ދެން މަރާމާތު ނުކުރެވޭނެ ކަމަށް ބެލެވެއެވެ.

އަދި އޯޕަން ސޯސް އިންޓެލިޖެންސް އެނަލިސްޓުން ވަނީ މިއީ "އެއްކޮށް ގެއްލިފައިވާ" އެއްޗެއްގެ ގޮތުގައި ސިފަކޮށްފައެވެ. ނަމަވެސް، ޕެންޓަގަނުން އަދި މި ހަމަލާގައި ލިބުނު ގެއްލުމުގެ ތަފްސީލު ރަސްމީކޮށް ކަށަވަރުކޮށްދީފައެއް ނުވެއެވެ.

މިދަނޑިވަޅުގައި، އީރާނުން މިހާރުވެސް މި ހަނގުރާމައިން ބަލިވެފައިވާ ކަމަށާއި އެއްބަސްވުމަކަށް އެދި އާދޭސްކުރަމުންދާ ކަމަށް ރައީސް ޑޮނަލްޑް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، އެމެރިކާގެ ޑިޕާޓްމަންޓް އޮފް ވޯ އިން ދަނީ ހަފްތާތަކަކަށް ދެމިގެންދާނެ އެއްގަމު މަގުގެ އޮޕަރޭޝަންތަކެއްގެ ޕްލޭންތައް އެކުލަވާލަމުން ކަމަށް ރިޕޯޓްތައް ބުނެއެވެ.

ވޮޝިންޓަން ޕޯސްޓަށް މައުލޫމާތު ދިން އެމެރިކާގެ ބައެއް އޮފިޝަލުން ވިދާޅުވި ގޮތުގައި، އެއްވެސް މިޝަނަކީ "ފުލް-ސްކޭލް އިންވޭޝަން" ނުވަތަ ފުރިހަމަ އަރައިގަތުމަކަށް ނުވާނެއެވެ. އޭގެ ބަދަލުގައި އެއީ އީރާނުގެ ތެޔޮ އެކްސްޕޯޓް ކުރާ މުހިންމު މަރުކަޒެއް ކަމަށްވާ ޚާރްގް އައިލެންޑް ހިފުން ނުވަތަ ހޯރްމޫޒް ކަނޑުއޮޅި ކައިރީގެ އައްސޭރިފަށަށް ދޭ ހަމަލާތަކެއް ފަދަ ވަކި މަގްސަދުތަކެއް ކަނޑައެޅިފައިވާ ރެއިޑްތަކެކެވެ.