ރޭސިންގ ޓްރެކް މަޝްރޫއާއިމެދު އީއައިއޭ ރިޕޯޓްގައި ބޮޑެތި ކަންބޮޑުވުންތަކެއް ފާހަގަކޮށްފި

ހުޅުލޭ އިރުމަތީފަރާތް ހިއްކައިގެން ތަރައްޤީކުރުމަށް ނިންމާފައިވާ ރޭސިންގ ޓްރެކްގެ އެންވަޔަރަންމަންޓަލް އިމްޕެކްޓް އެސެސްމަންޓް (އީ.އައި.އޭ) ރިޕޯޓުން، ގްރޭޓަރ މާލެ ސަރަޙައްދުގެ ވައިގެ ފެންވަރާއި، އާންމުންގެ ރައްކާތެރިކަމާއި، ދިރިއުޅުމަށް އަތުވެދާނެ ބުރޫތަކާ ގުޅޭގޮތުން ބޮޑެތި ކަންބޮޑުވުންތަކެއް ފާހަގަކޮށްފިއެވެ. އަދި މި މަޝްރޫޢު ފަރުވާތެރިކަމާއެކު މެނޭޖްނުކޮށްފިނަމަ، ތިމާވެށީގެ ގޮތުންނާއި އޮޕަރޭޝަނަލް ގޮތުން ސީރިއަސް ނުރައްކާތަކެއް ކުރިމަތިވެދާނެކަމުގެ އިންޒާރު ވަނީ ދީފައެވެ.

މި ރިޕޯޓުގައި ފާހަގަކޮށްފައިވާ އެންމެ ނުރައްކާތެރި އެއް ކަމަކީ، ރޭސިންގ ޓްރެކް ބޭނުންކުރަން ފެށުމުން ވައި ނުސާފުވާ މިންވަރު އިތުރުވެގެންދާނެ ކަމަށް ބެލެވޭ ބެލެވުމެވެ. ރޭސިންގ ހަރަކާތްތަކުގެ ސަބަބުން، ޚާއްޞަކޮށް ފުރޮޅުލީ އުޅަނދުތަކުގެ ފުރޮޅު ހޭކެމުންދިއުމާއި އިންޖީނުން ބޭރުވާ ދުމުގެ ސަބަބުން، PM2.5 އަދި PM10 ފަދަ ކުދި ޕާޓިކިއުލޭޓް މެޓަރތައް ވަރަށް މަތީ މިންވަރަކަށް އުފެދޭނެކަން އެސެސްމަންޓުން ހާމަވެއެވެ. މިއީ ސިއްޙީ ގޮތުން ބޮޑެތި ނުރައްކާތަކެއް ހުރި ކުދި ކުނޑިތަކެކެވެ. ޚާއްޞަކޮށް މާލެ-ހުޅުމާލެ ލިންކް ރޯޑް ބޭނުންކުރާ ދުއްވާ މީހުންނާއި، ހިނގާ މީހުންނާއި، ބައިސްކަލް ދުއްވާ މީހުންނަށް މީގެ ނުރައްކާ ބޮޑެވެ. މި ތަޣައްޔަރުވުން ހަރުދަނާގޮތެއްގައި ކޮންޓްރޯލް ނުކޮށްފިނަމަ، ނޭވާލާ ނިޒާމާއި ހިތުގެ ބަލިތައް ކުރިމަތިވުމުގެ ފުރުޞަތު އޮތްކަމަށް ރިޕޯޓުގައި އިންޒާރު ދީފައިވެއެވެ.

ވައިގެ ފެންވަރުގެ އިތުރުން، އިޖުތިމާޢީ އަދި ތިމާވެށީގެ އެހެނިހެން ދަތިތަކަށްވެސް އީ.އައި.އޭ ރިޕޯޓުގައި އަލިއަޅުވާލާފައިވެއެވެ. ދަތުރުފަތުރު ބާރުބޮޑު އަދި މީހުން ދިރިއުޅޭ ސަރަޙައްދެއްގައި ރޭސިންގ ފެސިލިޓީއެއް ގާއިމުކުރުމުން، މެދުނުކެނޑި އަޑުގަދަވުމުގެ މައްސަލަ ކުރިމަތިވެ، ކޮންމެ ދުވަހަކު އެ ސަރަޙައްދުން ދަތުރުކުރާ އެތައް ހާސް ބަޔަކަށާއި ކައިރީގައި އުޅޭ މީހުންނަށް އުނދަގޫވާނެ ކަމަށް ރިޕޯޓްގައި ބުނެފައި ވެއެވެ.

މީގެ އިތުރުން، މި މަޝްރޫޢުގެ ސަބަބުން އަތިރިމަތީގެ ގުދުރަތީ ރީތިކަމަށް ބަދަލު އައިސް، މިހާރު އާންމުން ހިތްއުފާކޮށްލުމަށް ބޭނުންކުރާ ސަރަޙައްދުގެ ގެއްލިގެންދާނެ ކަމަށް ވެސް ރިޕޯޓްގައި ބުނެފައި ވެއެވެ. މިފަދަ ބަދަލުތަކުގެ ސަބަބުން އަތިރިމަތީގެ ހަމަހިމޭންކަން ގެއްލި، އާންމުން އެ ސަރަޙައްދު ބޭނުންކުރުމަށް އޮތް ޝައުގުވެރިކަން ކުޑަވެދާނެކަން ރިޕޯޓުގައި ފާހަގަކޮށްފައިވެއެވެ.

މުހިންމު ކަމެއްގެ ގޮތުގައި، މަޝްރޫޢު ރޭވުމާއި ހިންގުމުގައި ހުރި ބައެއް ނުރައްކާތައްވެސް އެސެސްމަންޓުގައި ފާހަގަކޮށްފައިވެއެވެ. މަޝްރޫޢު މެނޭޖްކުރުމުގައި ފަރުވާކުޑަވެއްޖެނަމަ، ރާއްޖޭގެ އެންމެ ބާރުބޮޑު ދަތުރުފަތުރުގެ މަގު ކަމަށްވާ މާލެ-ހުޅުމާލެ ލިންކް ރޯޑުގެ ޓްރެފިކަށް ބުރޫއަރާނެ ކަމުގެ އިންޒާރު ވަނީ ދީފައެވެ. މަސައްކަތް ކުރިއަށްދާއިރު ނުވަތަ ޓްރެކް ބޭނުންކުރާއިރު ދިމާވާ އެއްވެސް ހުރަހެއް ނުވަތަ ނުރަނގަޅު މެނޭޖްމަންޓެއްގެ ސަބަބުން މުޅި މާލެ ސަރަޙައްދުގެ ދަތުރުފަތުރަށް ވަގުތުން ނޭދެވޭ އަސަރު ކުރާނެ ކަމަށް ރިޕޯޓްގައި ބުނެފައި ވެއެވެ.

މީގެ އިތުރުން، އެއާޕޯޓުގެ އޮޕަރޭޝަންތަކަށް ބުރޫއަރާފާނެ ކަމުގެ ކަންބޮޑުވުންވެސް ރިޕޯޓުގައި ފާޅުކޮށްފައިވެއެވެ. މި މަޝްރޫޢު ހިންގާ ސަރަޙައްދަކީ ވެލާނާ އިންޓަރނޭޝަނަލް އެއާޕޯޓާ ވަރަށް ކައިރި ސަރަޙައްދަކަށް ވުމުން، ބަރު މެޝިނަރީ ބޭނުންކުރުމާއި ނުވަތަ ވަކި އުސްމިނަކަށްވުރެ އުސްކޮށް ތަންތަން ހެދުމަކީ، ރަނގަޅަށް ރެގިއުލޭޓް ނުކޮށްފިނަމަ ވައިގެ ދަތުރުފަތުރުގެ ރައްކާތެރިކަމަށް ނުރައްކާވެދާނެ ކަމެއް ކަމަށް ރިޕޯޓްގައި ވަނީ ބުނެފައެވެ.

މި މަޝްރޫޢަކީ ރާއްޖޭގައި މަޤްބޫލުވަމުން އަންނަ މޮޓޯސްޕޯޓްސް ކުރިއެރުވުމަށް ހުށަހަޅާފައިވާ މަޝްރޫޢެއް ނަމަވެސް، މީގެ ސަބަބުން ދޫކޮށްލަންޖެހޭ ކަންތައްތައް ބޮޑުކަން އީ.އައި.އޭ ރިޕޯޓުން ސާފުވެއެވެ. މި ރިޕޯޓުގެ ހޯދުންތަކުން ބާރުއަޅަނީ، ފާހަގަކުރެވިފައިވާ ނުރައްކާތައް ތިމާވެށީގެ އަދި އާންމު ސިއްޙަތުގެ ބޮޑު މައްސަލައަކަށް ބަދަލުވިޔަނުދިނުމަށްޓަކައި، ހަރުދަނާ ފިޔަވަޅުތަކެއް އެޅުމަށާއި، ފަރުވާތެރިކަމާއެކު ރޭވުމަށާއި، މެދުނުކެނޑި މޮނިޓަރ ކުރަމުން ގެންދިއުމަށެވެ.