އީރާނުގެ ބޯޓުތަކެއް ފައްތާލި ކަމަށް ބުނެ އެމެރިކާއިން ހަދަނީ ދޮގު – އީރާން

ހޯރްމޫޒް ކަނޑުއޮޅިން ދަތުރުކުރާ ވިޔަފާރި އުޅަނދުތަކަށް ނުރައްކާކުރި ކަމަށް ބުނާ އީރާނުގެ ކަނޑުގެ ސިފައިންގެ ހަ އުޅަނދެއް އެމެރިކާގެ ސިފައިން ފައްތާލި ކަމަށް ބުނާ ވާހަކަތައް އީރާނުން ދޮގުކޮށްފިއެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ އިސްވެރިޔާ އެޑްމިރަލް ބްރެޑް ކޫޕަރ ހޯމަ ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވީ، އެ ސަރަހައްދުގައި ހަރަކާތްތެރިވި އީރާނުގެ ކަނޑުގެ ސިފައިންގެ ކުޑަ ފައުޖެއް އެމެރިކާގެ އަސްކަރިއްޔާއިން "ނައްތާލާފައިވާ" ކަމަށެވެ.

މި ހަމަލާއަކީ "ޕްރޮޖެކްޓް ފްރީޑަމް" ގެ ދަށުން ދިން ހަމަލާއެއް ކަމަށް ރިޕޯޓްކޮށްފައިވެއެވެ. މިއީ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން އީރާނަށް ދިން ހަމަލާތަކަށްފަހު، ހޯރްމޫޒް ކަނޑުއޮޅީގައި ތާށިވެފައިވާ ތެޔޮ ޓޭންކަރުތަކާއި އެހެނިހެން އުޅަނދުތަކަށް ހިމާޔަތް ދިނުމަށް އެމެރިކާގެ ރައީސް ޑޮނަލްޑް ޓްރަމްޕް އާދީއްތަ ދުވަހު އިއުލާން ކުރެއްވި އޮޕަރޭޝަނެކެވެ.

"އީރާނުގެ ހަނގުރާމަމަތީ ބޯޓުތަކެއް ފައްތާލި ކަމަށް ބުނެ އެމެރިކާއިން ކުރާ ދައުވާއަކީ ދޮގެއް،" އީރާނުގެ އަސްކަރިއްޔާގެ އިސް އޮފިޝަލަކު ހޯމަ ދުވަހު އައި.އާރް.އައި.ބީ ނިއުސް އެޖެންސީއަށް ވިދާޅުވިއެވެ.

ކޫޕަރ ދައުވާ ކުރެއްވި ގޮތުގައި އެމެރިކާގެ އަސްކަރިއްޔާއިން ވަނީ އީރާނުގެ މަދުވެގެން ހަ ބޯޓު ފައްތާލާފައެވެ. އަދި އޭއެޗް-64 އެޕާޗޭ އަދި އެމްއެޗް-60 ސީހޯކް ހެލިކޮޕްޓަރުތައް ހިމެނޭހެން، ކަނޑުއޮޅި ސަރަހައްދުގައި އެމެރިކާގެ ވަރުގަދަ އަސްކަރީ ގާބިލުކަމާއި ހަމަލާދިނުމުގެ ބާރު އެބައޮތް ކަމަށް ވިދާޅުވެ އޭނާ ވަނީ ފަހުރުވެރިވެފައެވެ.

ހޯމަ ދުވަހު ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އީރާނުގެ އަސްކަރިއްޔާއިން ވަނީ ހޯރްމޫޒް ކަނޑުއޮޅި ކައިރިން އެމެރިކާގެ ކަނޑުގެ ސިފައިންގެ ޕެޓްރޯލް ބޯޓަކަށް ހަމަލާދީފައެވެ. ނަމަވެސް ސެންޓްކޮމް އިން ވަނީ އެކަން ދޮގުކޮށް، އެމެރިކާގެ އެއްވެސް ބޯޓަކަށް ހަމަލާއެއް އަމާޒުވެފައި ނުވާ ކަމަށް ބުނެފައެވެ.

ދުނިޔޭގެ ކަނޑުމަގުން ކުރާ ތެލުގެ ވިޔަފާރީގެ ގާތްގަނޑަކަށް 20 އިންސައްތަ ހިއްސާކުރާ މި މުހިންމު ކަނޑުއޮޅީގެ މައްސަލައިގައި އެމެރިކާއާއި އީރާނާއި ދެމެދު ވަނީ ބޮޑު ހިޔާލުތަފާތުވުމެއް އުފެދިފައެވެ. ރިޕޯޓްތައް ބުނާ ގޮތުގައި އީރާނުން ހުށަހެޅި އެންމެ ފަހުގެ ސުލްހައިގެ ހުށަހެޅުމުގައި ކަނޑުއޮޅި ބެލެހެއްޓުމަށް އާ ނިޒާމެއް ހުށަހެޅި ނަމަވެސް، އެމެރިކާއިން ވަނީ އެ ހުށަހެޅުން ބޭރުކޮށްލާފައެވެ.

އެމެރިކާއަށް ގަބޫލުކުރެވޭ ފަދަ ސުލްހައިގެ އެއްބަސްވުމަކަށް އީރާނުން އެއްބަސްކުރުވުމަށްޓަކައި، ޓްރަމްޕް ވަނީ އީރާނުގެ ބަނދަރުތައް ބަންދުކުރުމަށް (ނޭވަލް ބްލޮކޭޑް) އަމުރުކުރައްވާފައެވެ. އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ މިއީ އޭޕްރީލް މަހުގެ ކުރީކޮޅު ގާއިމުކުރި ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފަށް ހިންގާ "އުދުވާނީ އަމަލެއް" ކަމަށް ސިފަކުރައްވާފައެވެ.

"ޕްރޮޖެކްޓް ފްރީޑަމް އަކީ ޕްރޮޖެކްޓް ޑެޑްލޮކް (މަގުބަންދު މަޝްރޫއެއް)،" އެކްސްގައި ކުރެއްވި ޕޯސްޓެއްގައި އަރަގްޗީ ވިދާޅުވިއެވެ. އަދި "ނުބައި ނިޔަތް އޮތް ފަރާތްތަކުގެ ސަބަބުން އަލުން އަނބުރާ ދަތި ހާލަތަކަށް ދަމައިގަނެވިދާނެތީ ސަމާލުވުމަށް" އޭނާ ވަނީ އެމެރިކާއަށް އިންޒާރު ދެއްވާފައެވެ.