ޤަޠަރު އަމީރުގެ 500 މިލިއަން ޑޮލަރުގެ ސުޕަރޔޮޓް ބޮޑު މަރާމާތަކަށްފަހު ބޭނުންކުރަން ފަށައިފި

ދުނިޔޭގެ އެންމެ ފާހަގަކޮށްލެވޭ އެއް ސުޕަރޔޮޓް ކަމަށްވާ، ޤަޠަރުގެ އަމީރުގެ މިލްކުވެރިކަމުގައިވާ 123 މީޓަރުގެ "އަލް ލުސައިލް"، ޖަރުމަނުގެ ލާސަން ކުންފުނީގައި ހަތް މަސް ދުވަހުގެ ދިގު މަރާމާތަކަށްފަހު އަލުން ކަނޑަށް ބާލައިފިއެވެ.

2017 ވަނަ އަހަރު ބަނދެ ނިންމި މި ބިޔަ އުޅަނދު މަރާމާތުކޮށްފައިވަނީ 2026 ވަނަ އަހަރުގެ މެޑިޓެރޭނިއަން ހޫނު މޫސުމަށް ތައްޔާރުވުމުގެ ގޮތުންނެވެ. މި މަސައްކަތުގެ ތަފްސީލުތައް ހާމަކޮށްފައި ނުވި ނަމަވެސް، މި ދާއިރާގެ މާހިރުން ލަފާކުރާ ގޮތުގައި މީގެ ތެރޭގައި އިންޖީނާއި މެޝިނަރީތަކުގެ ބޮޑު ސާވިސްއެއް ކުރުމާއި، ޓެކްނޮލޮޖީ އަޕްގްރޭޑް ކުރުމާއި، ބޭރުފުށުގެ ރީތިކުރުންތަކުގެ އިތުރުން ޤާނޫނީ ގޮތުން ފުރިހަމަކުރަންޖެހޭ އިންސްޕެކްޝަންތައް ހިމެނެއެވެ.

ޖަރުމަނުގެ ލާސަން ޝިޕްޔާޑުން ބަނދެފައިވާ "އަލް ލުސައިލް" އަކީ މިހާތަނަށް ބަނދެފައިވާ އެންމެ ބޮޑެތި ޔޮޓްތަކުގެ ތެރޭގައި ހިމެނޭ އުޅަނދެކެވެ. 123 މީޓަރުގެ ދިގުމިން ހުންނަ މި ޔޮޓުގެ ބަރުދަނުގައި ގާތްގަނޑަކަށް 8,489 ޖީ.ޓީ ހުރެއެވެ. މި އުޅަނދުގެ ބޭރުފުށުގެ ޑިޒައިން ތައްޔާރުކޮށްފައިވަނީ އިނގިރޭސިވިލާތުގެ އެޗް2 ޔޮޓް ޑިޒައިން އިންނެވެ. އަދި އެތެރެ ފަރުމާކޮށްފައިވަނީ މާޗް އެންޑް ވައިޓް އިންނެވެ. އުޅަނދުގެ އާކިޓެކްޗަރަލް މަސައްކަތްތައް ކޮށްފައިވަނީ ލާސަން ކުންފުނިން އަމިއްލައަށެވެ.

ކުރިން "ޕްރޮޖެކްޓް ޖުޕިޓަރ" ގެ ނަމުގައި ބަނދެވުނު މި އުޅަނދު ރަސްމީކޮށް ހަވާލުކުރީ 2017 ވަނަ އަހަރު ނޯވޭގައެވެ. އަދި ފަހުން މި އުޅަނދަށް "އަލް ލުސައިލް" ގެ ނަން ދެވުނީ ޤަޠަރުގައި ހަލުވިކަމާއެކު ތަރައްޤީވަމުން އަންނަ ލުސައިލް ސިޓީއަށް ނިސްބަތްކޮށެވެ. މި ޔޮޓުގެ ޒަމާނީ ފަރުމާއާއި، ބިއްލޫރި ބޭނުންކޮށްފައިވާ ގޮތުގެ ސަބަބުން މުޅި ދުނިޔޭގެ ސަމާލުކަން ވަނީ ލިބިފައެވެ.

ފަސް ފަންގިފިލާއަށް ފަރުމާކޮށްފައިވާ މި ސުޕަރޔޮޓްގައި ގިނަ އަދަދެއްގެ ލަގްޒަރީ ވަސީލަތްތައް ހިމެނެއެވެ. އޭގެ ތެރޭގައި ހެލިކޮޕްޓަރު ޖައްސާ ތަނަކާއި، ބޮޑު ފަތާ ފެންގަނޑަކާއި، ބީޗް ކްލަބަކާއި، މުނިފޫހިފިލުވުމުގެ އެކި ސަރަޙައްދުތައް ހިމެނެއެވެ.

އަދި އުޅަނދުގެ ބޭރުފުށުގެ ރީތިކަން ނުގެއްލޭނެހެން ފަރުމާކޮށްފައިވާ ކުދި ލޯންޗުތަކާއި މޫދު ކުޅިވަރުގެ ސާމާނު ބަހައްޓާ ގަރާޖުތައް ވެސް ހުރެއެވެ. އުޅަނދުގެ ބޭރުގައި ގިނަ އަދަދަކަށް ބިއްލޫރި ޖަހާފައިވުމުން، އެތެރޭގައި ތިބެގެން ކަނޑުގެ ހިތްގައިމު މަންޒަރުތައް ފެންނަން ހުރެއެވެ.

"އަލް ލުސައިލް" ގެ އެތެރޭގައި 18 ސުއިޓް ހުންނައިރު، 36 މެހެމާނުންނަށް ތިބެވޭނެއެވެ. އަދި 56 މުވައްޒަފުންގެ ޓީމަކުން މި އުޅަނދުގައި ޚިދުމަތް ދެއެވެ. މީގެ އިތުރުން ސިނަމާއަކާއި، ޖިމަކާއި، ބިއުޓީ ސެލޫންއެއްގެ އިތުރުން ފަންގިފިލާތައް ގުޅުވައިދޭ ލިފްޓެއް ވެސް ހުރެއެވެ. އުޅަނދުގެ މެދުގައިވާ ހިތްގައިމު އޭޓްރިއަމްއަކީ އެތެރޭގެ ފަރުމާގެ އެންމެ މުހިންމު އެއް ބައެވެ.

މިފަހަރުގެ މަރާމާތުގެ ތަފްސީލު ލާސަން ކުންފުނިން ހާމަނުކުރި ނަމަވެސް، މާހިރުން ބުނާ ގޮތުގައި އުޅަނދުގެ ދެ އިންޖީނާއި، ސްޓެބިލައިޒަރުތަކާއި، ނެވިގޭޝަން އަދި ސެކިއުރިޓީ ސިސްޓަމްތައް ވަނީ އަޕްގްރޭޑްކޮށްފައެވެ. އަދި 10 އަހަރުވާން ކައިރިވެފައިވާ އުޅަނދަކަށްވުމުން، ޑެކްތަކާއި ފަތާ ފެންގަނޑު މަރާމާތުކުރުމަކީ އާންމުކޮށް ކުރާ ކަންކަމެވެ.

ގާތްގަނޑަކަށް 500 މިލިއަން ޑޮލަރުގެ އަގުހުރި މިފަދަ ސުޕަރޔޮޓެއްގެ މި ފެންވަރުގެ މަރާމާތަކަށް 20 މިލިއަނާއި 40 މިލިއަން ޑޮލަރާ ދެމެދުގެ އަދަދެއް ޚަރަދުވާނެ ކަމަށް އިންޑަސްޓްރީގެ ހިސާބުތަކުން ދައްކައެވެ.

ނަމަވެސް "އަލް ލުސައިލް" ގެ މަރާމާތަށް ހިނގި ޚަރަދުގެ ރަސްމީ އަދަދެއް ހާމަކޮށްފައެއް ނުވެއެވެ. ޖުމްލަ 15,024 ހޯސްޕަވަރު އުފައްދައިދޭ އެމް.ޓީ.ޔޫ ގެ ދެ ޑީސަލް އިންޖީނު ހަރުކޮށްފައިވާ 'އަލް ލުސައިލް' އަށް ގަޑިއަކު ގާތްގަނޑަކަށް 19 ނޮޓްގެ ބާރުމިނުގައި ދަތުރުކުރުމުގެ ގާބިލުކަން ލިބިގެންވެއެވެ.

އަދި އާންމުކޮށް ދަތުރުކުރަނީ ގަޑިއަކު 12 ނޮޓްގެ ބާރުމިނުގައެވެ. މި އުޅަނދުގައި ގާތްގަނޑަކަށް 500,000 ލީޓަރުގެ ތެޔޮ ރައްކާކުރެވޭއިރު، މިއީ ގާތްގަނޑަކަށް 4,500 ނޯޓިކަލް މޭލުގެ ރޭންޖެކެވެ. ލޮއިޑްސް ރެޖިސްޓަރގެ މިންގަނޑުތަކަށް ބިނާކޮށްފައިވާ މި ޔޮޓަކީ، އެންމެ މަތީ ފެންވަރުގެ އަރާމާއި މުއްސަނދިކަމާއެކު ދުނިޔޭގެ ކޮންމެ ތަނަކަށްވެސް ދިގު ދަތުރުތައް ކުރެވޭ ގޮތަށް ފަރުމާކޮށްފައިވާ އުޅަނދެކެވެ.

މަރާމާތުގެ މަސައްކަތްތައް ނިންމުމަށްފަހު 'އަލް ލުސައިލް' މިހާރު އަލުން ހިދުމަތަށް ނުކުމެފައިވާއިރު، މިއީ ދުނިޔޭގެ އެންމެ ފާހަގަކޮށްލެވޭ އެއް ރޯޔަލް ސުޕަރޔޮޓް، އޭގެ އަސްލު ބަނދެ ނިންމިތާ ގާތްގަނޑަކަށް ދިހަ އަހަރު ފަހުންވެސް، ލަގްޒަރީ ޔޮޓިންގްގެ އެންމެ ކުރީ ސަފުގައި ދެމިއޮތްކަން ކަށަވަރުކޮށްދޭ ކަމެކެވެ.